Версия для слабовидящих 
Сэтинньи 11-21 күннэригэр "корнхолга" Өрөспүүбүлукэ бастакы аһаҕас турнира Адаптивнай физическэй култуура уонна успуорт өрөспүүбүлүкэтээҕи киинигэр буолан ааста. Бу тэрээһин кыайыы 85 сылын чэрчитинэн ыытылынна. Күрэхтэһии сыала-соруга: успуорка маассабаһы көҕүлээһин, чөл олоххо угуйуу, инклюзияны уопсастыбаҕа сайыннарыы уонна күүстээх хамаанданы талыы. Күрэххэ сааһыттан тутулуга суох, доруобайдар уонна доруобуйаларынан хааччахтаах дьон тэҥҥэ оонньоотулар. Уопсайа 23 улуустан 83 киһи кытынна. «Корнхол» диэн интэриэһинэй саҥа успуорт көрүҥүн хотугу улуустар сэргээн, сэҥээрэн көхтөөхтүк кыттыыны ылбыттара олус үөртэ. Күрэххэ кытыннылар: Булуҥ, Муома, Аллайыаха, Орто Халыма, Томпо, Өлөөн, Эдьигээн, Усуйаана, Сунтаар, Ньурба, Үөһээ Бүлүү, Бүлүү, Кэбээйи, Горнай, Дьокуускай, Нам, Хаҥалас, Мэҥэ-Хаҥалас, Амма, Чурапчы, Уус-Алдан, Өлүөхүмэ, Таатта улуустара.
«Корнхол» успуорт көрүҥүн 2018 сылтан дьарыктаан саҕалаабыппыт, элбэх улуустарга маастар-кылаас ыыттыбыт. Бастакы сылбытыгар Нам улууһугар үс хамаанда тэрийэн табаарыстыы көрсүһүү оҥорбуппут, дьон олус сэргээн, бары дуоһуйа сынньанан, астынан тарҕаспыппыт. 2024 сылга Намҥа ыытыллыбыт араас сылларга оскуоланы бутэрбит выпусниктар бэстибээллэригэр «корнхол» көрүҥ быһыытынан киирбитэ олус кэрэхсэбиллээх, киэҥ араҥаны хабан дьон интэриэһин күүскэ ылбыта.
Билигин үгүс улуустарга бииргэ үлэлэһэр дьоннордоохпут, хас тэрээһин түмүгун куйаар ситиминэн отчуоттуу олороллор. Бэлиэтээн эттэххэ, Аммаҕа - А.Матвеев, Горнайга - П.Никулин, К.Кардашевскай, Сунтарга - А.Жараев, Намҥа - С.Сивцев, П.Петухов, Өктөмҥө - Соломоновтар, Хатаска - Копыриннар дьиэ-кэргэттэрэ. Кинилэр үгүс араас таһымнаах тэрээһиннэри ыытан, сороҕун бэйэлэрэ спонсордаан дьону-сэргэни үөрдэллэр, чөл олоҕу уһансаллар.
«Корнхол» сүүруутэ-көтүүтэ суох, олус умсугутуулаах, эдэриттэн эмэнигэр тиийэ киһи тартаран оонньуур оонньуута буолан түргэнник, киэҥник тарҕанар. Оонньуурга олус судургу: 6м 40см ыраахтан, 1м 50 см дуоскаҕа мөһөөччук быраҕан очко хомуйаҕын. Дуоска үөһэ түстэҕинэ 1 очко, хайаҕаска киирдэҕинэ 3 очко. СааҺыттан, ыарыытыттан тутулуга суох, ханна баҕарар: залга, аҺаҕас салгыҥҥа, офиска, дачаҕа, дьиэ кэргэҥҥэ көхтөөхтук оонньонор оонньуу.
Дьокуускайга Адаптивнай сыантырга дьарыктанар спортсменнар сылын аайы куйаар ситиминэн ыытыллар Арассыыйа чемпуйэнээтигэр кыттыыны ылан үрдүк ситиһиилэнэллэр. 2024 сылга ыытыллыбыт Арассыыйа чемпуйэнээтигэр 28 регионтан Саха сирин “Самородок ”хамаандата дьахталларга үс бастакы миэстэни, эр дьоҥҥо бастакы, иккис миэстэлэри ылан сүргэбит көтөҕүллүбүтэ.
Күрэххэ кыттыбыт дьон ахсааныттан көрдөххө, туруоруллубут сыал-сорук сиппитинэн ааҕыахха сөп. Киһи сэргиирэ диэн, оскуоланы 80-с сылга бутэрбит Олимпийскай выпусктартан саамай элбэх киһи күрэхтэстэ.
Биллэн туран, кыайыы киһиэхэ барытыгар тиксибэт, долгуйбут, санааҕа ылларан сыыһа туттубут, сатыыры да сатаабат буолбут түгэннэр элбэх буолаллар. Үчүгэй дьарыктаах дьон кыайыынан кынаттанан, илии тутуурдаах, өттүк харалаах бараллар.
Күрэх кыайыылаахтара:
Дьахталларга:
- 1 миэстэ - Спиридонова Ульяна Викторовна (65 очко) Бүлүү
- 2 миэстэ - Егорова Любовь Васильевна (54 очко) Орто Халыма
- 3 миэстэ - Романова Саргы Николаевна (52 очко) Дьокуускай
Эр дьоҥҥо:
- 1 миэстэ - Петров Михаил Михайлович (92 очко) Дьокуускай
- 2 миэстэ - Петухов Прокопий Прокопьевич (87 очко) Нам
- 3 миэстэ - Алексеев Альберт Иванович (83 очко) Ньурба
«Лучший Снайпер-2025г» анал аат хаһаайыттарынан буоллулар:
- Петров Михаил Михайлович (27 очко)
- Спиридонова Ульяна Викторовна (15 очко)
«Лучший организатор»
- Волкова Валентина Семеновна
«Пример для подражания»
- Максимов Владимир Афанасьевич
«За стойкость духа»
- Чукров Ариан Арианович.
«За волю к победе»
- Варламов Сергей Иванович
- Матвеева Майя Гаврильевна
Кыайыылаахтар туоһу суруктарынан, мэдээллэринэн, анал бириистэринэн наҕараадаланнылар.
Күрэх кыттыылаахтарыгар баҕарабыт – дьарык ситимин быспакка дьарыктаныҥ, ситиһиилээх буолуҥ, чөл олоҕу уһансыҥ, чэгиэн-чэбдик туруктаныҥ, дору
Күрэхтэһиини иилээн -саҕалаан ыыттылар: Арассыыйа остуолун оонньууларын «Джакколо», «Шаффлборд» көрүҥнэрин призера Наталья Николаевна Никифорова уонна Өрөспүүбүлүкэтээҕи адаптивнай успуорт киинин методист-инструктора, Арассыыйа остуол оонньууларын федерациятын Саха сиринээҕи салаатын бэрэссэдээтэлэ Элеонора Петровна Николаева.
Суруйда Э.П. Николаева
