Сэтинньи 10-12 күннэригэр “Боотур Уус” стадиоҥҥа Чурапчытааҕы физкултуура уонна спорт институтун тэрийиитинэн, бастакытын пневматическай саанан ытыыга Анал байыаннай дьайыы кыттыылаахтарыгар, доруобуйаларынан хааччахтаах дьоҥҥо уонна институт иһинэн ыытылла  турар адаптивнай спорт кууруһун истээччилэригэр аһаҕас турнир буолан ааста. Манна барыта 20 спортсмен кытынна.

Турнир кыттыылаахтарыгар икки күннээх үөрэтэр-эрчийэр дьарыгы тириэньэр Роман Аржаков салайан тэрийдэ.Үһүс күн турнирга үс бөлөххө арахсан, тыҥааһыннаах киирсии буолла. Күрэхтэһии түмүгүнэн бөлөх ахсын кыайыылаахтар билиннилэр:

I  бөлөх –  Анал байыаннай дьайыы кыттыылаахтара:

• Василий Лукин – 1-кы миэстэ;
• Анатолий Манасытов – 2-с миэстэ;
• Эдуард Захаров – 3-с миэстэ.

II бөлөх – доруобуйаларынан хааччахтаах дьоҥҥо:

• Вячеслав Васильев – 1 миэстэ;
• Екатерина Федорова – 2 миэстэ;
• Эдуард Кардашевскай – 3-с миэстэ.

 III бөлөх – куурус истээччилэрэ:

• Павел Кирсанов – 1-кы миэстэ;
• Василий Габышев – 2-с миэстэ;
• Николай Пермяков – 3-с миэстэ.

Миэстэлэспит дьоммут мэтээлинэн, дипломунан, анал бириистэринэн наҕараадаланнылар.

Маннык ураты сонун турниры тэрийбит институт салалтатыгар, ректор Иннокентий Готовцевка, ФДПО деканыгар Марианна Манасытоваҕа, тириэньэр Роман Аржаковка, куратор А. Ивановаҕа улууска бастакытын адаптивнай спорка саҥа сүүрээни киллэрэн, элбэх категория спортсменнары бу көрүҥҥэ бэйэлэрин холонон көрөллөрүгэр, инникитин салгыы дьарыктаналларыгар улахан укулааты уурбуттарын иһин махтанабыт, чуолаан тириэньэр Роман Аржаков  ытыы тиэхиньикэтин көрдөрөн, туһааннаах сүбэлэри биэрэн, кылгас кэм иһигэр элбэҕи билбиппитигэр, сатаабыппытыгар, туһунан истиҥ махталбытын тиэрдэбит.

Иннокентий Матвеев.