Өрөспүүбүлүкэтээҕи адаптивнай успуорт киинигэр тиһигин быспакка сыллата сылдьар, дьарыктанар дьонноохпут.

Олортон биирдэстэрэ - Алексеев Николай Семенович.

Кини чуолаан остуол тенниһинэн сөбүлээн дьарыктанар, тренажернай саалаҕа сылдьар. 

Кини сөбүлүүр дьарыгын туһунан икки хоһоон суруйбутун эһиги дьүүлгүтүгэр таһаарабыт.

  • Тренажерка

Лаһырҕас тимирдэр тыастара,

Бу саала иһиттэн иһиллэр,

Киэҥ көхсүм күүскэ тыынара,

Сүрэҕим тэбэрэ доргуйар.

Кыахтаахтык "Самородокка" турунан,

Сүһүөхпүн имитэ кэлбитим,

Былчыҥмын хамсатан, тиритэн,

ин күүстээх турукка киирбитим.

Бу манна спортсмен уолаттар,

Дуоһуйан, астынан тахсаллар,

Күүстээх дьарыктан кыаҕыран,

Ситиһии сыанатын билэллэр.

 

  • Сөбүлүүр дьарыгым - теннис

Сыллар-хонуктар ааһаллар,

Бэл кырдьа бардым доҕоттор,

Ол эрэн санаабар, сүрэхпэр,

Тапталлаах дьарыгым угуйар.

Урукку курдук эрдэлээн,

Тиэтэйэн, хомунан, чэй иһээт,

Тиэннистии тиийэбит дьарыкка.

Киэҥ ааны дохсуннук аһаммыт,

Сып-сылаас саалаҕа киирэбит,

Үөрүүлээх-көтүүлээх долгуҥҥа,

Мичээрдээн дуоһуйан ылабыт.

Тренердэр үөрүүнэн көрсөллөр,

Илии тутуһан ылаллар,

Ким ханнык сонуннаах кэлбитин,

Кэпсэтэн, үллэстэн ылаллар.

Дьэ онтон дьаныардаах дьарыкка,

Остуолга тохтубут көлөһүн,

Мээчиги охсуу, эрийии, быһыы,

Тиритии-хорутуу баһаама,

Ооньуу ухханыгар

Сылайбыт-элэйбит эбиппин.

Ол онтон дуоһуйуу ыламмыт,

Сүрэхпит үөрэр, астынар,

Биһиги таптыыр дьарыкпыт

Олоххо, дьулуурга угуйар!

Николай Семенович Дьокуускайдааҕы типографияҕа 40-тан тахса сыл үлэлээбит. Үлэ ветерана, Россия Бэчээтин туйгуна.

Кини кылгастык бэйэтин туһунан кэпсиир: "Ол саҕана типография үлэтэ хаһан да бүппэт, этэргэ дылы "рутина" этэ. Аҥардас "Чолбон" сурунаал 30-тан тахса тыһыынча, "Полярная звезда" 15-тэн тахса тыһыынча экземплярдааҕа. Ону таһынан төһөлөөх хаһыат, сурунаал, кинигэ тахсарын ааҕан сиппэккин.. Эдэр сылдьан дзюдонан, самбонан дьарыктаммытым, республикаҕа миэстэлэһэрим. Тыраамбаланан тохтообутум. 54 сааспар сүһүөхпүнэн инбэлииккэ тахсыбытым. Республикатааҕы адаптивнай Кииҥҥэ уонча сыл утумнаахтык дьарыктанан доруобуйабын көннөрүннүм. Остуол тенниһигэр кэккэ ситиһиилэрдээхпин: бэйэм кылааспар республикаҕа чемпионнаабытым, иккитэ иккистээбитим, куорат күрэхтэһиилэригэр  элбэхтик миэстэлэспитим. Сааһыттан тутулуга суох спордунан дьарыктаныҥ, доруобуйаҕытын тупсарыҥ диэн ыҥырабын!"

 

Өрөспүүбүлүкэтээҕи адаптивнай успуорт киинэ